Aan: Alle belanghebbendes

Van: Johan Stumpf – Besturende Direkteur: KKI

______________________________________________________________________

Nuwe horisonne vir Dr. Willem Burger

Dit is met spyt dat KLEIN KAROO International (KKI) die bedanking van Dr. Willem Burger as Hoofbestuurder: Navorsing en Ontwikkeling aankondig.  Willem het besluit om ‘n geleentheid in ‘n ander bedryf te benut.  Hy was reeds sedert 1997 in die KLEIN KAROO Groep van Maatskappye werksaam.

In lyn met KKI se toegewydheid om die bedryf in geheel te bevorder deur op die voorpunt van ontwikkeling te wees, is daar met Willem onderhandel om ‘n oplossing te vind waar die bedryf nog in die toekoms nog op sy kundigheid kan staatmaak.  Die instandhouding van die internasionale netwerk sal dus deurlopend prioriteit aandag geniet.

Soos die meeste besighede wêreldwyd, moet KKI ook sy huidige kostestrukture evalueer, en waar nodig, dit in lyn bring met die moeilike ekonomiese toestande.  In die lig hiervan is besluit om nie die pos van Hoofbestuurder: Navorsing en Ontwikkeling te vul nie, maar eerder die pos van Dr. Adriaan Olivier te verbreed om die mees kritiese funksies van hierdie pos oor te neem.  KKI wens vir Adriaan geluk en sterkte toe met die nuwe uitdaging.

KKI se bestuur sal die situasie oor die volgende 12 maande evalueer.  Om kontinïuteit te verseker, is dit aangenaam om aan te kondig dat daar suksesvol ‘n deeltydse kontrak met Willem beding kon word vir hierdie tydperk. 

Willem sal tot einde Februarie 2010 op ‘n deeltydse basis vir KKI beskikbaar wees ten einde sekere projekte af te handel.  Verder sal Willem ook as ondersteuning vir Adriaan beskikbaar wees in die geval van ad-hoc situasies wat mag onstaan.

KKI wens hiermee vir Willem sterkte toe met sy nuwe uitdagings, en glo dat hy die uitstekende werk wat hy in die volstruisbedryf verrig het, sal voortsit in sy nuwe rol.

______________________________________________________________________

NAVRAE: JOHAN STUMPF BY 044 203 5234 of 076 243 3994